जितेंद्र आव्हाडांनी केलं रिहानाचं कौतुक; टीकाकारांना झापले

February 04, 2021 Marathi 0 Comments

मुंबई: दिल्लीतील शेतकरी आंदोलनाबद्दल चिंता व्यक्त केल्यामुळं सत्ताधारी भाजप व काही मान्यवरांच्या टीकेचं लक्ष्य ठरलेली पॉपस्टार रियाना हिचं राज्याचे गृहनिर्माण राज्यमंत्री यांनी जोरदार समर्थन केलं आहे. 'गरिबीतून पुढं आलेल्या रियानाला दीनदुबळ्या घटकांबद्दल अजूनही आस्था आहे. पैसा व प्रसिद्धीमुळं ती संपलेली नाही. शेतकऱ्यांच्या आंदोलनाबद्दल आवाज उठवून तिनं ते दाखवून दिलं आहे. तिची ही भूमिका तोंडात मिठाची गुळणी धरून बसलेल्या तमाम सेलिब्रिटींच्या तोंडात मारणारी आहे,' असं आव्हाड यांनी म्हटलं आहे. वाचा: केंद्र सरकारच्या नव्या कृषी कायद्यांच्या विरोधात हजारो शेतकरी गेल्या ७० हून अधिक दिवसांपासून आंदोलनाला बसले आहेत. त्यावरून देशात गदारोळ सुरू आहे. युनोनंही या आंदोलनाची दखल घेतली आहे. नुकतंच रॉबिन रियाना हिनं याबद्दल एक ट्वीट केलं होतं. आपण यावर का बोलत नाही, असा प्रश्न तिनं केला होता. त्यावरून भारतातील काही सेलिब्रिटींनी तिला भारताच्या अंतर्गत बाबींमध्ये ढवळाढवळ न करण्याचा सल्ला दिला. राष्ट्रवादी काँग्रेसचे नेते जितेंद्र आव्हाड यांनी फेसबुक पोस्टच्या माध्यमातून हे सेलिब्रिटी व भाजप कार्यकर्त्यांवर तोफ डागतानाच रियानाचं जोरदार कौतुक केलं आहे. वाचा: रियानाच्या ट्वीटमुळं भक्तांची गोची झाली आहे. रियानाला देशद्रोही आणि नक्षलवादीही ठरवता येत नाही. पाकिस्तानात जा असंही सांगता येत नाही, अशी त्यांची अडचण झाल्याचं आव्हाड यांनी म्हटलं आहे. 'आमच्या अंतर्गत बाबींत ढवळाढवळ करू नकोस असं म्हणणाऱ्यांनाही आव्हाड यांनी सुनावलं आहे. 'अबकी बार ट्रम्प सरकार' असं बोंबलत आपले नेते तिथं कशासाठी गेले होते? ती अमेरिकेच्या अंतर्गत प्रश्नात ढवळाढवळ नव्हती का?,' असा सवाल आव्हाड यांनी केला आहे. आव्हाड आपल्या फेसबुक पोस्टमध्ये म्हणतात... रॉबिन रियाना फेन्टो, तथा रियाना, ही वेस्ट इंडिजच्या बार्बाडोस शहरात जन्मलेली एका फेरीवाल्याची मुलगी. लहानपणी ती आपल्या वडिलांसोबत रस्त्यावर कपडे विकायची. त्यात वडील मद्यपी. आई सोडून गेलेली. शिवाय रियानाला डोकेदुखीचा प्रचंड त्रास होता आणि त्यावर सतत उपचार सुरू होते. रियानाला आवाजाची निसर्गदत्त देणगी होती. तिच्या शाळेत तिने गायलेलं गाणं एका अमेरिकन म्युझिक कंपनीच्या मालकाने ऐकून तिला तिथे बोलावली. "म्युझिक ऑफ द सन" हा तिचा पहिला अल्बम २००३ साली प्रसिद्ध झाला तेव्हा ती फक्त १५ वर्षांची होती. तो इतका गाजला आणि खपला की तिथून तिने मागे वळूनच पाहिलं नाही. आज वयाच्या ३२ व्या वर्षी ती अब्जोपती आहे. जगभरात तिचे कोट्यवधी चाहते आहेत. आपले जुने दिवस मात्र रियाना विसरलेली नाही. गरीब मुलांना शिक्षण, एड्स आणि कर्करोगाचे रुग्ण यासाठी ती खूप दानधर्म करते. एकूणच दुबळ्या घटकांबद्दलची तिची आस्था, पैसा आणि प्रसिद्धीमुळे संपलेली नाही. वाचा: दील्ली, हरयाणा, उत्तर प्रदेश इथे शेतकरी आंदोलनाला चिरडण्यासाठी इंटरनेट बंद ठेवलं आहे. अमेरिकेच्या सीएनएन वृत्तसंस्थेने यावर एक सविस्तर बातमी दिली. तिचा दाखला देऊन, "आपण यावर का बोलत नाही?", असं ट्वीट तिने काल केलं आणि भारतातील सोशल मीडियावर रान उठवलं. दोन महिन्यांहून अधिक काळ सुरु असलेल्या या आंदोलनात, ज्यात सुमारे ६० शेतकरी अद्यापपर्यंत मरण पावले आहेत, त्यावर भारतातील तमाम सेलिब्रिटी तोंडात मिठाची गुळणी धरून बसले असताना, अमेरिकेतली एक प्रख्यात गायिका आवाज उठवते, हे विलक्षण आहे. नव्हे, कित्येकांच्या तोंडात मारणारं आहे. भक्तांची तर पार गोची झाली. तिला देशद्रोही म्हणता येत नाही की नक्षलवादी. पाकिस्तानात जा म्हणूनही सांगता येत नाही. "तू आमच्या अंतर्गत बाबीत कशाला ढवळाढवळ करतेस" असा दुबळा प्रतिकार काहींनी केला. त्यावर, "अबकी बार ट्रंम्प सरकार" बोंबलत आपले नेते तिथे कशासाठी गेले होते? ती अमेरिकेच्या अंतर्गत प्रश्नात ढवळाढवळ नव्हती का? अशा तीव्र प्रतिक्रिया स्वाभाविकपणे आल्या. हा वैश्विकीकरणाचा जमाना आहे. मानवतेशी निगडीत घटनांचे पडसाद आता त्या देशापुरते मर्यादित रहात नाहीत. ते जगभर उमटतात. जॉर्ज फ्लॉईड या काळ्या माणसाची अमेरिकेत पोलिसाकडून हत्या झाल्यानंतर अख्ख्या जगाने गुडघा टेकवून त्याला श्रद्धांजली वाहिली होती. त्यात जो बायडन होते तसेच मैदानावरचे क्रिकेटपटू सुद्धा होते. या नव्या जगात इंटरनेट बंद ठेवणं हा मुस्कटदाबीचाच एक अवतार आहे. दुर्दैवाने भारत आज यात जगात पहिल्या क्रमांकावर आहे. (आणि आपण 'डिजिटल इंडिया' करणार म्हणे). तुम्ही ही मुस्कटदाबी केलीत तरी जगात कुठे ना कुठे तरी आवाज उठणार आणि तुमची नाचक्की होणार ही काळ्या दगडावरची रेघ आहे. आपला आवाज सुमधूर असला तरी त्याला धार सुद्धा आहे, हे रियानाने दाखवून दिलं.